لك رجلين


نعمة كبيره من نعم ربنا الكتيره الموجوده فى الانسان بس الواحد

زى غيرها من النعم احيانا مش بياخد باله منها عشان يحمد ربنا عليها



لك رجلين بتقف بيهم تستنى الاتوبيس زى حاجات كتير بنستناها

او بتقف بيه على طابور العيش وبتقف بيهم بين ايدين ربنا تصلى


لك رجلين بتمشى بيهم للخير او للشر

اوبتمشى مع اصحابك

او بتمشى بيهم عشان تفك كربه محتاج وتساعده


لك رجلين بتجرى بيهم تلحق شغلك عشان تلحق تبنى مستقبلك

او بتجرى فى ماتش كوره مع اصحابك


المهم انك عندك رجلين احمد ربنا عليهم..



سبب البوست ده

امبارح كانت اولى خطوات ابنى لتعلمه للمشى


برغم ان عملية المشى قد تبدو سهله وبسيطه واحيانا لا اراديه

الا انها كانت عنده طبعا مسأله معقده وصعبه

ازاى يقف لوحده ويتزن ويسيب ايد ماما

لا ويمشى كمان ....


وبالفعل نجح ابنى فى الوقوف وحده والتقدم خطوه للامام

ياااااااه كم هى السعاده عندما انتقل خطوه للامام ثم تبعتها خطوات

واد ايه سعادته هو فى انه نجح فى العمليه اللى كانت تبدو له معقده

بل شديده التعقيد ...

وعرفت ليه بيقولو طريق الاف ميل بيبدأ بخطوه

لانها اصعب خطوه واهم خطوه

مذكرات ام لاول مره










اتم ابنى عامه الاول من حياته




الحمد لله مرت بكل ما فيها




بصراحه برغم ما يحمل هذا السن من شقاوه ورخامه احيانا وغلاسه احياناً تانيه




الا انها الذ طبعا من كل اللى فات ..



الاول كنت بحس انى بتعامل مع كائن



مش بقلل من اهمية الايام الاولى من عمره او عمر اى طفل



لكن قصدى انى مكنتش بحس طبعا بسعادتى حاليا بعد التجاوب الفظيع من ابنى



لاى شىء بفعله او اى شىء من حوله ..



دلوقت اقدر اقول انى بقيت بفهمه ...طبعا ما انا بقى عندى



خبره (سنه بحالها )



وهوكمان بدء يفهمنى







Delete




بعد اول تجربة تدوين

توقفت و بعد ان تحمست لهذه الفكره اصيبت بالاحباط

الافكار كثيره لكن اشعر انها غير مكتمله ناقصه

او ان شىء بداخلى لا يريد ان يكمل شىء او حتى بدء شىء جديد .

قررت الغاء المدونه .......

لكنى لا اريد ان اشجع نفسى على هذا الفعل

هذه المدونه كانت شىء جديدا جدد حياتى التى توقفت فجأه ..

لذا كانت المدونه لاشعر انى لازلت على قيد الحياه الفكريه افكر واتكلم واناقش

فقررت .........بالغاء فكره الغاء المدونه


لانها وان كنت لا ادون فيها باستمرار الا انى كلما نظرت

اليها على شاشه الكمبيوتر كأنى اضغط على زرتشغيل دماغى

ليفكر

وحتى وان لم تظهر تدويناتى يكفينى انه يعمل

ولا بد فى يوم ما تنطلق فيه تدويناتى الى النور .

الدوره الرياضيه العربيه









امبارح كان افتتاح الدوره الرياضيه العربيه

الحاديه عشر اللى بتستضيفها مصر السنه دى 2007


حبيت اعرف تاريخ الدوره وبدايتها كانت امتى

وعرفت الاتى

فى سنه 1947تقدم السيد عبد الرحمن عزام اول امين عام لجامعه الدول العربيه

بطلب انشاء دوره العاب رياضيه تجمع الدول العربيه

لانه كان نفسه حاجه تجمع الشعوب العربيه

ففكر فى الشباب والزاى يجمعهم على شىء واحد( لانها من افضل الوسائل

لربط الشباب العربى وتمكينهم من بناء مستقبل الامه العربيه

وهى من احب ما يستهوى نفوس الشباب

ويحليهم بالفضائل ويوثق روابطهم الاجتماعيه ولا شك ان اجتماعهم

فى صعيد واحد كل عام هو خير وسيله للتعارف

والتحابب هو ايضا دعوه للوحده الروحيه...)



لكن للاسف رفضت دعواه لكنها الحمد لله نفذت فى عام 1953

وكانت مصر زى النهارده هى البلد المضيف




بصراحه دى اول مره اعرف المعلومات دى

او انى اسمع عن الدوره اصلا

جايز لانى مليش فى الرياضه او متابعة اخبارها

بس ممكن لان الواحد حاليا بيتطلع لاى ذره تجمع الشعوب العربيه

فعشان كده اخذت بالى من الدوره الرياضيه العربيه


طيب هما الشعوب العربيه هيه اللى محتاجه حاجه توحدها

اعتقد ان عندنا ما يوحدنا كفايه ان احنا بنتكلم لغه واحده

متهيالى اللى محتاج الدوره هما رؤسئنا

رؤسأ الدول العربيه


تفتكرو لو حصل كده ممكن يبقى فى امل تتحسن اوضاع

.......... شعوبنا العربيه



النهارده الصبح فى صبح الخير يا مصر

المذيع قال جمله غريبه اوى

بعدما انهى حوار مع احد القادمين مع الوفد الليبى


قال (ياريت يكون قصدى وصل

وفاقد الشىء لا يعطيه

اى دوله من غير ثقافه ولا تاريخ

اكيد مفرحتش زينا امبارح )

مش عارفه هيه الكلمه عاديه ولا يقصد بيها

حد معين او دوله معينه ......

الله اعلم

اول تجربه

ليه اول تجربه ديما الواحد بيخاف منها

فى ناس جريئه بتخوض التجربه

وهيه حاطه مخاوفها على جنب .....


وفى ناس بتحط مخاوفها قدام عنيها وتعمل الف حساب وحساب

بتخوض التجربه وهيه بتقدم رجل وبتاخر رجل


طب ايه اللى بيخلى الناس الجرئيه دى تخوض التجربه

وهيه مش خايفه


وياترى الناس الجرئيه مش بتقع فى نفس المشاكل

اللى بتقع فيها الناس اللى مش جرئيه

اذا خاضو نفس التجربه
ياريت اعرف رايكم