الزماره

لو ابنك مسك زماره

وقعد يزمر بيها ....يزمر بيها ...يزمر بيها....

لحد ما ودانك اتخرمت .....

هتعمل ايه ؟؟؟

ملحوظه :هو لسه بيزمر بردو .......

بنى سويف زحمه

تدوينتى على مدونتنا الجماعيه

شخابيط سويفيه

------------------

غريبــــــــــة

غـريـبه...........

نشوف ال 10 جنيه كبيرة جدا عندما نأخذها إلى المسجد

وصغيرة جداً عندما نأخذها إلى السوق.

غـريـبه..........

أننا نرى ساعة في طاعة الله طويلة

ولكن ماأسرع التسعون دقيقة في لعب كرة القدم

أو ثلاث ساعات على النت....

غـريـبه.........

نرى أنه من المجهد قراءة جزء من القرآن الكريم

ونرى أنه من السهل قراءة رواية مختارة من 200 إلى 300 صفحة؟

غـريـبه..........

أننا نتقبل ونصدق ما تقوله الجرائد

ولكن نتساءل عن ما يقوله القرآن الكريم؟!!.

الحمد لله

(لو بسط الله الرزق لعباده لبغو فى الارض ولكن ينزل بقدر ما يشاء انه بعباده خبير بصير*

وهو الذى ينزل الغيث من بعد ما قنطو وينشر رحمته وهو الولى الحميد*)

الحمــــــــــــــد لله

(ومن اياته خلق السموات والارض ومابث فيهما من دابة وهو على جمعهم اذا يشاء قدير*)

سبحانك يــــــــــــــــــــــارب

(ومااصابكم من مصيبة فبما كسبت ايديكم ويعفو عن كثير *

وما انتم بمعجزين فى الارض ومالكم من دون الله من ولى ولا نصير* )

لك الحمد يارب كما ينبغى لجلال وجهك

وعظيم سلطانك

الخط العربى

رغم ان الخط العربى
ورسم الخطوط ليست من اهتماماتى ....

لكن لا مانع ابدا من تعلمه وتعلم فنه
بعد الجمله اللى قالتها لى امى "ليه متتعلميش الخط العربى ...."
دار الموضوع فى ذهنى
ليه لأ ...
الواحد هيتعلم حاجه جديده ممكن يفيد بيها غيره
الشعور بالسعاده لتعلم شىء جديد
وسيله للحفاظ على لغتنا العربيه ...طبعا هى مش هتنقرض لانها محفوظه
بحفظ القران الكريم ....
واشتغل قانون الجذب
وظهر مره واحده ناس كتير اعرفهم
دخلو المعهد ده او اتخرجو منه او بيدرسوا فيه
ده حتى مدونة حبيبتى حطم قيودك

الحروف والكلام شكله حلو اوى على السبوره
بس شكله شنيع فى كراستى
يارب خطى يتحسن ويبقى شىء من هذا القبيل

اياد فى القاهره

هى دى مصر يا عبله

مين عبله دى ؟؟؟ ما علينا ....

سافرنا فى رحله اسريه الى القاهره -مصر ام الدنيا -شىء مش جديد

هو صحيح انا زياراتى لمصر مش كتير بس دى كان ليها طابع خاص ...

والجديد المره دى ان دى اول زياره للبشمهندس اياد للقاهره ...

وشاف حاجات كتير شاف العماير العاليه والعربيات الكتيـــــــــــــــــــــــــــره اوى
اللى خلتنا طبعا منفكرش نسيبه يمشى جنينا زى ما بنمشى فى بنى سويف

بداءنا الرحله فى الصباح الباكر وبعد ما لبسنا انا وباباه وصحيت اياد

اللى كان نفسه يضربنى لانى ازعجت سيادته وصحيته من النوم بدرى
لولا انه فتح عينيه لقى نفسه فى الشارع فعرف الحمد لله اننا خارجين
وكانت دى الحسنه اللى غفرلنا بيها ....

وفى الموقف انتظرنا عمة اياد وابن عمة اياد اللى كانو متجهين معانا للقاهره

ولما وصلو فوجئنا بان البشمهندس اياد وابن عمته نور الدين لابسين زى بعض

بالظبط وكأن بنى سويف نزلها كساء شعبى للاطفال ॥

وركبنا الميكروباص ووصلنا الحمد لله للقاهره بس
غلطنا غلطه بسيطه

ان لما زوجى نام فى الميكروباص مصحتهوش فور وصولنا للقاهره

ولما صحيناه كان المكان اللى المفروض ننزل فيه عدا

نزلنا فى مكان طبعا ابعد ومحتاج اكتر من مواصله عشان نوصل للمكان اللى ريحينه ....

اضطررنا طبعا لخوض معركة الموصلات

لان كان عددنا ميكفيش تاكس ومينفعش تاكسين عشان محدش فينا يعرف الطريق غير زوجى......

الحمد لله مشيينا وبعدينا ركبنا اتوبيس

مش عارفه ليه بتوع الافلام والمسلسلات بيشوهو صورة الاتوبيسات

يطلعوهلنا ديما زحمة والناس راكبه فوق بعضها

॥ ما الاتوبيس اللى ركبته كان رايق وفى اماكن فاضيه كمان ...

(ده كان راى الصبح اللى اتغير على بالليل )
نزلنا ومشينا لحد محطة المترو ॥

طبعا كانت اول مره لاياد انه يركب معانا المترو وعجبته اوى السلالم الكهربائيه

بعد المترو مشينا برده بس الحمد لله ماكنش بعدها اى موصله

ووصلنا بالسلامه المكان اللى كنا ريحينه
طبعا قلت فى نفسى فينك يا بنى سويف يا حبيبتى

فى هدؤك وموصلاتك السهله حتى منغير موصلات ممكن تلف البلد كلها ...

ربنا يعين سكان القاهره

بالليل فى رحلة العوده الحمد لله كانت مواصله واحده لحد المكيروباص كانت المترو

مركبتش طبعا فى عربة النساء عشان انا اصلا معرفش اسم المحطه اللى هننزل فيها واخدتها من قاصرها

وركبنا مع زوجى والحمد لله لقيت مكان قعدت فيه ومعايا اياد

وقفت جانبى بنوته اموره اوى شعرها اصفر ولابسه سلوبت عسلى لون عنيها بالظبط

وباباها كان قاعد بعيد عنها شويه عمال يقولها تعالى اقعدى وهيه تعمل براسها لا...

وبعد شويه راحتله وهى معديه من جانبى خبطت فى اياد ...

।رجعت تانى وقالت لاياد معلش .... وراحت لباباها ....

وقعد يتكلم معاها سألها مين نزلك الشارع ؟...

البنوته:انا نزلت لوحدى ...انا مش بخاف من السارع
انا نزلت عسان الايس كليم ....بس مس لقيت كله حلاوه حلاوه .....
باباها : وليه تنزلى لوحدك ...
البنوته: انا ساطره مس بتوه ....بتوه بالليل بس ....
استمعت الحواركله بنوته عسوله بس نص الحروف ضايعه
وقبل وصول المترو للمحطه التاليه باباها اخدها ووقفوا قدام الباب
فجأه لقيتها ميلت نحيتى ووشوشتنى وقالتلى :( على فكره انا اسمى فاطمه ................)
المترو وقف والباب اتفتح وشدها باباها من ايديها وخرجوا من المترو قبل متكملى كلامها ....
اشمعنى انا اللى اخصتنى بالكلام
يمكن حست انى كنت بسمعها ......

من قديم الزمان

يحكى أن مستشارا دخل على مولاه فوجده مستغرقا في التفكير،

فسأله عما يهمه،

فقال: أريد أن أفرض ضريبة على البنجر.. السكر.. بقيمة 10%

لتمويل خزائني التي تكاد تفرغ،وأفكر كيف سيتقبل الناس هذا القرار

قال المستشار: دع الأمر لي يا مولاي

.*******.

جمع المستشار أعوانه،

وطلب منهم أن يبثوا في الأسواق إشاعات

بأن الحاكم ينوي فرض ضريبة بمقدار 50% على البنجر واللحم والتمر والقمح والشعير

.. فضج الناس، وأخذوا ينتقدون الأمر علنا،

وبدأوا يعبّرون عن سخطهم وعدم رضاهم..

وكان الأعوان ينقلون ما يحدث في الأسواق وما يقوله العامة للمستشار أولا بأول

وفي الأسبوع الثاني

طلب المستشار من أعوانه بث إشاعة تؤكد الإشاعة الأولى،

وأضاف عليها أن بعض المستشارين هم من أشاروا على الحاكم بهذا الأمر،

وأن القرار سيصدر قريبا جدا

أخذ الناس يقلبون الأمر،

ويقولون: الضريبة مرتفعة جدا، ومن الظلم أن تدفع على جميع هذه الأصناف،

لو كانت 10 أو حتى 15%، أو لو كانت على صنف واحد لهان الأمر

عندها ذهب المستشار إلى الحاكم وقال: مولاي، الآن أصدر الأمر بفرض الضريبة..

ودعني أعد صياغة القرار

كتب المستشار: تلبية لرغبات شعبنا الكريم،

ونزولا عند رأيهم،

فقد قررنا عدم الإنصات لمستشاري السوء

الذين سعوا إلى إثقال كاهل المواطنين بالضرائب الكثيرة،

واكتفينا بفرض ضريبة بسيطة بمقدار 12% على مادة البنجر

فتنفس الناس الصعداء وضجوا بالثناء والدعاء للحاكم الحكيم الذي يراعي شعبه،

ولا يثقل كاهلهم بالضرائب الفاحشة.

*******

.هذا ما حدث في قديم الزمان.. ومازال يحدث

.*******

من مجموعة د. طارق فاروق

كن زوجا عظيما

كلما عظم شأن الزوجه ..

دل ذلك على نبل زوجها وعظيم خلقه...

استوقفتنى تلك الجمله وتذكرت جمله شبيهه لها ,

الكل يعرفها ....(وراء كل رجل عظيم امرأه ....)والبعض يكملها ....بامرأه عظيمه

بالطبع فهى ان لم تكن عظيمه لم تدفع بصاحبها الى النجاح ...

ولكن لما لايدفع صاحبنا صاحبته (زوجته)الى الامام والنجاح

لما لا ننجح سويا ...لما لا ننضج سويا ......

ثقافتنا وموروثاتنا دعت بأن تقف المرأه دئما مكان الجندى المجهول ...

ما وراء كاميرا الحياه.......

ربما يعود ذلك الى خوف الرجل ....

والخوف هنا يتعدد ...

فمنهم من يخاف ان تنازعه المراه نجاحه فتنجح فيما فشل فيه

او تتقدم عليه فى نفس مجاله فتسرق الاضواء منه

او منهم من يخاف ان تقصر الزوجه الام فى واجباتها ومسئوليتها كأم وزوجه

لكن لما الخوف دون التجربه ..دون المساعده ...دون المسانده

اليست هذه الزوجه من تقف دائما بجانبك تدفع بك دائما للامام ....تساند وتساعد

فالننظر حولنا سنجد سيدات ناجحات نجحن فى الاثنين معا

فهى ام حنون وزوجه رائعه وسيده ناجحه فى مجالها ..

لا اقصد مجلات العمل فحسب ..فالنجاح بالطبع لايقتصر على العمل

فهناك الفنون والادب وغيرها

ساعد زوجتك ان تجد مجالا محبوبا لديها تبدع فيه وتنجح

وتقدم لنا شيئا عظيما ..

وساعدها ان توازن وتتوازن

فتكون زوج نبيل وعظيم الخلق

فكلما عظم شأن الزوجه دل ذلك على

نبـــــــل زوجها وعظيـــــــم خلقه

الف مبرو يا مصر

طبعا طبعا البوست متأخر

بس النت عملها وفصل

المهم انى حبيت انقل لكم فرحة اهل بلدى
بنى سويف بالفوز وكاس افريقيا

الف مبروك يا مصر

دى اول مره اشوف ماتش كوره بالكامل

لا.....عشان مكذبش عليكم ...تانى مره

المره الاولى برده كان ماتش النهائى فى بطولة افريقيا

على ما اتذكر كان سنة 98

والمره دى اتفرجت على الماتش كله برغم انى لا اهوى كرة القدم بالتحديد

غير انى استمتعت بالماتش ....وشوفت الفرحه من اللاعيبه ومن الناس فى كل مصر

وفى بلدى بنى سويف

فرحونى اكتر

الناس دى بذلت اقصى ما فى وسعها

انا كنت بشوف اللاعب يقع ويقوم ويحارب عشان الكره متضعش منه

والكل متعاون والهدف واحد

والجمهور كله على كلمه واحده

ليه برده مش بنشجع اللعبه الحلوه فى كل حاجه ...

ليه حماسنا ومثابرتنا فى الكوره بس ....

ليه الناس اتجمعت على دى وبس ....

ليه مش بنفرح كده ...

لاى حاجه تانيه حلوه فى بلدنا....

ليه مش بنبقى على كلمه واحده كلنا زى ما كنا على كلمه واحده واحنا بنشجع مصر...

اتمنيت وانا راجعه بيتى بعد الماتش

وانا شايفه الفرحه فى كل الناس

انها تكون فرحتنا

برجوع كل بلد راحت مننا

انها تكون فرحه بأولادنا اللى فى غزه يوم ماينامو فى بيوتهم

مش جعانين ....مش بردنين ....مش خايفين .....

يارب زى ما فرحتنا فرحهم

شكرا منتخب مصر ادخلتم البهجه على قلوبنا

شكرا ابو تريكه

تعاطفك مع غزه

الصورمنhttp://www.swefonline.com

الف مبروك

بعد انقطاع عن التدوين

اللى هما يعنى كام تدوينه كده على أدى

قلت فرصه ارجع بالمناسبه دى

الف الف مبروك حبيبتى

مولوووووووتوف

الف مبروك د/ شذى

على العقد وعقبال البناء

بارك الله لكما وبارك عليكما وجمع بينكما فى خير